Me gler oss til fine dagar med biskop Stein Reinertsen på besøk øvst i Setesdal.
Foto: Agder og Telemark bispedøme
8. - 13. september er det duka for ei skikkeleg kyrkjeleg festveke i Bykle, Valle og Hylestad. Biskop i Agder og Telemark bispedøme, Stein Reinertsen, kjem for å halde visitas med kyrkjelydene øvst i Otredal prosti og Setesdal. Gjennom dagane får biskopen møtt tilsette og sokneråd i kyrkja, kommuneleiingane i Bykle og Valle kommunar og lokalt næringsliv.
Me ynskjer å gjere stas på besøket med å invitere til to kulturkvelder. Den fyrste foregår i Kyrkjestoga i Valle, tysdag 8. september kl. 18:00. Her deltek lokale folkemusikarar, kulturskule og leikarring saman med friviljuge og tilsette i kyrkja. Det er viktig for kyrkja å vise fram det særmerkte kulturlivet som finnast i Setesdal, som òg har kome inn på UNESCOs liste over immateriell kulturarv. Det vert kakebord og utlodning til inntekt for misjonsprosjektet vårt i samband med Stefanusalliansen.
Onsdag 9. september kl. 19:00 vert det salmekveld i Bykle kyrkje. Her deltek mange friviljuge medarbeidarar i det som vert ein stemningsfull kveld med plass til ettertanke. Mellom anna får me høre Randi Steinsholt spele på saksofon saman med organisten vår Eirik Hodnemyr. Me vonar me fyller godt opp i kyrkja når biskopen kjem denne kvelden til Bykle.
Legg òg merke til at det vert andaktar på høvesvis Valle bygdeheim, onsdag 9. september kl. 10:30, og på Bykleheimen, kl. 11:30. Det vert Ung kyrkje i Fjellgardane kyrkje, torsdag 10. september kl. 16:00, med pizza å få.
Bortgangen til vår kjære kong Harald set sitt naturlege preg på veka, og me vil markere dette dei stadene det er naturleg. Kongen si gravferd vert strømma på storskjerm i Bykle kyrkje, onsdag 9. september kl. 13:00. Det er opent for alle som vil å kome denne dagen for å sjå gravferda saman med andre, tenne ljos eller vere i stille.
Visitasgudsteneste og kyrkjekaffi
Sundag 13. september kl. 11:00 vert det visitasgudsteneste i Valle kyrkje. Dette er ei gudsteneste som er felles for kyrkjelydene i Bykle, Valle og Hylestad. Me oppfordrar alle til å kome til kyrkja for å vere med på denne markeringa. I gudstenesta deltek biskopen, saman med sokneprest Toralv Frøysaa Lie, organist Eirik Hodnemyr, songarane Silje Høgevold og Sigrid B. Berg og felespelarane Stina Brandin Hovet og Anna Slaby Driel. I gudstenesta er det konfirmantpresentasjon, og biskopen held sitt visitasforedrag straks etter gudstenesta.
Etter visitasforedraget reiser me bort til Valle kultursenter og har kyrkjekaffi. Rett nok er det middag - og det vert setesdalssuppe til alle som kjem. Her får me høyre songarane Synne Viki og Inger Lise Stulien saman med eit band leia av organist Eirik Hodnemyr. Dette vert ei flott avslutning på ei veke der me har vist fram mykje av det me som lokalsamfunn og kyrkje har å by på.
For dei som har tenkt seg på kulturkyrkjearrangement i Austad kyrkje kl. 15:00 på sundagen, så legg me opp til at ein rekk dette, sjølv om det er eit arrangement utan samband med bispevistiasen.